مجلس دفن الزهراء

مجلس دفن مولاتنا الزهراء عليها السلام

كتبته واضافة عليه : رقيه صالح البطي
دققته واضافة النعي النهائي : سكينه صالح البطي

إنا لله وإن إليه راجعون ألف لاحول ولاقوة إلا بالله العلي العظيم
صلى الله عليك ياسيدي ويامولاي يارسول الله ، صلى الله عليك ياحبيب الله ، وعلى ابنتك الطاهرة المظلوم بعلها ، والمكسور ضلعها ، الملطومة على عينها
ماخاب والله من توسل بضلعك المكسور ، أمن من لاذ ببابك يازهراء

رأتهم يرفعون جنازة أمها .. فكادت أن تموت ألماً وحزناً .. سارعت الخطى نحو المشيِّعين .. مهلاً أريد وداع أمي .. مع انها ودعتها قبل ان يعقدوا الكفن .. لكنه الفراق ولوعة اليتم.

أتت ترجو بمدمعها الهمولِ
رويداً حاملي نعش البتولِ
أريدُ وداعها إن تسمحوا لي
ووحدي مع جنازتها اتركوني 

دعوني عند نعش الأم وحدي
لأخبرها بآلامي ووجدي
أوسد قربَ كسر الضلع خدي
وأرجوها بأن لا تتركيني

عزيزتك الصغيرةُ يا عظيمة
إليكِ تبثُّ شكواها الأليمة
أصدقاً صرتُ يا أمي يتيمة
ألا يا ليتها عميت عيوني

كأني بالوصي أتى إليها
كوالدةٍ هوى يحنو عليها
مدامعه جرت في وجنتيها
فنادت والندا مزجُ الأنينِ

اقولك طفله بعمر خمس سنوات شنو حالها تشوف امها ممده النعش 

زينب على امها تصفگ اليسرى باليمين
لا تدفنون الوالده ام حسن وحسين

لا تدفنوها يا علي وردّوها للـدّار
مقدرْ على خلوة المنزلْ يا حِـما الجار
امنـه البتولـه شابـه بـويـه يكرار
واشلون عيشتنا بعدها يا حما الديـن

لا كن بويه علي ماوصيك على امي الزهراء تراها راحت وليها ضلع مكسور ، ليها خد ملطوم

بِهْدَاي يَ إِلْ تِصَّب الماي بِهْدَاي
بِالهُون غَسِّل لَلْحَنُونَه و نُور عينَاي
بِالهُون هَذِي أميمتِي  هَاي
قلبي ترى ذايب عليها وكِلِّه أوجاع

بِهْدَاي قَلّبها و لا تِلْجِم ضِلِعْهَا
و العين رَاعِيهَا و لا تِمْسَح دَمِعْهَا
تَرَى العين مُحْمَرّه مِنْ كَفِّ إِلْ صَفَعْهَا
و مِنْ شِدّة العصره حَمِلْها طاح بِالقَاع

هَوِّن عَليهَا رُوعَة التكفين باِلليل
منها القَلُب مِرْتَاع مِنْ ظُلمِ الرجَاجِيل
باِلهُون كَفِّنهَا و لا اِتْشِّد الكفن حيل
باِلهُون صدر أمِ الحسن مكسور لضَلاع

*أبيات تجنيز*

يلِّي تِشِيل النعش بِالهُون شِيلَه
بِاسم الله سَمِّي عَليهَا هَالجَلِيلَه
بِالهُون شَيّعْهَا وَ لا اِتْرَوّع العيلَه
و مِنْ تُوصَل إِلْ ذَاكِ القَبُر سَمِّي عَليهَا

يَلِّي تِنَزلُون الجَسَد بِهْدَايَه نَزّلُوه
وَ يَلِّي تِهِيلُون الثَرَى باِلهُون هِيلُوه
واِخْذُوا القَلُب يَمْهَا وبِالحُفْرَه دِفْنُوه
ويلي على إِلِّي سَافَرَت ويلي عليهَا


*بداية المجلس: *

آجركم الله شيعة معزين نعم ياشيعه لما انقطع صوت الزهراء تقول اسماء نادينها يازهراء ما اجابت ، يا ام الحسن والحسين ما أجابت ، دخلت اسماء الدار شافت الزهراء ممده نحو القبله و الرداء على وجهها ، رفعت الرداء عن وجهها اذ بالزهراء ميته صرخت اي وافاطماه وابتولاه صارت تجول بوسط الدار بعد ماتدري شتسوي اذ بالباب تطرق دخل الحسنان اسماء وين امنا ما لنا لانسمع لها صوت ان شاء الله طابت من علتها ...

ليش مانسمع ونين امنا ولا نسمع كلام
ان شالله طابت العلة وغاب ضرب ابن اللئام
لو يا أسما سافرت عنا وخلتنا أيتام
والشهيد يصيح لاتفاول ترى قلبي انكسر

سالمه وياليت يابن امي كلامي لايكون 
فالها فال السلامة وليت علتها تهون
قال خويه امنا نحيلة وهضمها ضرب المتون
نسأل الله الضلع المكسر من الزهره انجبر 
****
 دخلوا جائتهم اسماء بالطعام قالوا اوهل عهدتينا أن نأكل الطعام بلا أمنا الزهراء أين أمنا الزهراء لم تجب اشارت إلى دار الزهراء

دخلوا الدار أذ بهم ينظرون الزهراء ممده رفع الإمام الحسن الغطاء عن وجهها اذ به يرى الزهراء فارقت روحها الدنيا أين الصارخه وابتولاه وافاطماااه

جاء الخبر لأمير المؤمنين صار  يقوم ويطيح 
و في رواية اخرى أن الزهراء ماتت و رأسها في حجره وهو ينادي وافاطماه ... 

انكب الحسن والحسين .. 
جلس الحسين ينادي (( أماه كلميني أنا عزيزك الحسين ما أجابت ، قال اماه كلميني قبل خروج روحي من بدني )) في روايه تقول أن الزهراء رفعت يديها وضمت الحسنان إلى صدرها اين الصارخون وا فاطماه

أمير المؤمنين بعّد الحسن والحسين عن أمهم فاطمة اخبر اهل المدينه أن الزهراء فارقت الدنيا..

كان الناس ينتظرون خروج الجنازة للتشييع ، فأمر علي (ع) أباذر فنادى: انصرفوا، لمامضى من الليل شطره، وهدأت الأصوات، ونامت العيون، قام الإِمام لينفِّذ وصايا الزهراء"ع". 
حمل ذاك الجسد النحيف الذي أذابته المصائب حتى صار كالهلال.
حمل ذلك البدن الطاهر كي يُجري عليه مراسم التغسيل و التكفين وهو يقول..

مكسورة الاضلاع واحزني عليها
انا دهري فجعني بالنبي واليوم بيها
قوموا عينوني وجيبوا النعش ليها
ظلمة تراها الدار تصبح هالمسية

قام الإمام بتغسيلها، من تحت ثيابها تلبيةً لطلبها، و كانت أسماء بنت عميس تناول عليّاً الماء لتغسيل السيدة فاطمة.

بينما يغسلها مرت يده على ذاك الضلع المكسور.. صرخ آه ، ساعد الله قلبك يا مولاي يا امير المؤمنين...
أين الصارخه وا فاطمــاه

أقول أمير المؤمنين بس شاف ضلع من الزهراء مكسور شلون حال علي ابن الحسين اللي شاف اضلاع الحسين منثره ..

 ضلع واحد ياعلي وهد حيلك
چا ضلوع حسين شسويلك
...............
على الزهره تنحبت يوم المشت
يا علي والقلب من عندك يفت
شلون صار القلب يوم الحملت
بالنعش يا حيدره يوم السرت
وانته بهموم الزچيه تعثرت
تمشي وتوگع منو يتچيلك
...............
شلون لوشفت السبط فوق الثره
وبحوافر خيل صدره مكسره
وهم يعرفونه ابن خير الوره
وجده هم المصطفى ومن حيدره
وامه فاطمة البتول الطاهره
وكون زينب يمك وترويلك
...............
سلمان ينقل موقف ... يقول والله قد كسر قلبي علياً .. أراه قد وضع يده على خاصرته ويتكئ على الجدار.. يمشي ويقع ويصيح آه يازهراء.. 

قلت اتأمرنا بالصبر ونراك هكذا قال لاتلمني ياسلمان بينما انا اغسل الزهراء مرت يدي على اضلاعها فرأيتها مكسره اين الصارخه وافاطماه

مد الجنازة وسالت دمعة العين
و اصفق على اليسرى باليمين
ظل يقلب الجثه باليدين
لنه هجس بالصدر ضلعين
مكسور بأم الحسن وحسين

خله الجنازه و قعد بالحال
يصفق على اليمنى بالشمال
امدنق ودمع العين همال
سلمان قله وش هالاحوال
منت علي وخواض الاهوال

قله وعبراته غزيره 
لاتلومني الحاله خطيره
عند النبي وعندي اميره
ياسلمان حيره والله حيره
ضلعين في الزهره كسيره

حسبي على الظالم عصرها
كسر لضلوع اللي بصدرها
وبتروح حق بوها بقبرها
امنحله وشايب شعرها
وعشرين ما وصل عمرها

غسل الجثه وقلبه مفطور
لفها بجفن والدمع منثور
وقلها ومنه الدمع منثور
حسافه يوسدونك بالقبور

وركب عصابتها على العين
ولف الجسد وسط الكفن زين
قلها يابنت سيد الكونين
سلمي على خير النبيين
قدمي العذر له عن ابو حسين

انتهى أمير المؤمنين من تغسيلها وتكفينها نادى ( بني حسن ، بني حسين ) تعالوا و ودعوا أمكما الوداع الأخير جا الحسن والحسين رموا بأنفسهم على ذاك الجسد النحيل   وهم يبكيان أذ بالزهراء تخرج يديها من تحت الكفن فضمت الحسنان بصدرها .. إذ بهاتف من السماء ينادي ( ياعلي ارفع الحسنان عنها فلقد أبكيا ملائكة السماء )
 أمير المؤمنين شال نعش الزهراء.. مر بها عند قبر النبي نادى بصوت حزين يالله كلنا وياه خل ندخل ونسلم على رسول الله ونودع حوايجنا ( السلام عليك يارسول الله )...

اقعد جاتك الزهرة
شوف عيونها حمرة
على خدها أثر سطرة
مظلومة البتول يا طه الرسول

بعدك مادريت شصار
هجموا يالنبي على الدار
وقادوا حيدر الكرار
ومظلومة البتول يا طه الرسول

عصرها ونبّت المسمار
بين الباب وي الجدار
وسقط محسن يا مختار
مظلومة البتول ياطه الرسول

بعدما دفنوا الزهراء رجع الحسن والحسين الى الدار شافوا زينب جالسه بباب الدار و واضعه راسها بين رجلينها من شدة الحزن بس دخلوا فزت ليهم .. 

ياحسين وين اللي تقبلنا وتشمنه
وين الحنونه اللي رفسها برجله الشين
........
لنه يقلها كفي يازينب بواچيگ
خوفي اقلك كلمه ياخيه وتأذيك
البقى براسك راحت الزهره أمن اياديك

( راحت الحنونه راحت اللي تجمعنا راحت خيمة البيت يازينب )

ياحسين وين اللي تخلينه بحجرها
راحت ولا ردت ولا ندري بخبرها
ياما تقلبنا ولعبنا اعلى صدرها
ياما على الذرعان شالتنا ولموتون

لاكن حسن حسين شلون قدرتوا تشوفون الزهره وهي على المغتسل
وصفوا لي حالها

غسلها علي بيده وشاف ضلوع منكسره
صبره فارقه وشفنا كل ساعه وزفر زفره
گفنها ونادانا تعالوا ودعوا الزهره
عن اليمنى و عن اليسرى تمددنا ونادينا

يبنت الهادي حاچينا احنا أولادك حسن وحسين
يازينب و الله من لچفان أمنا طلعت ليدين
و إلى الأحضان ضمتنا و عاينا ابو الحسنين

يمه بقينا من بعدك يتامى
يايمه الليل بعدك ماننامه
يايمه الدهر صوبنا بسهامه 

تعالي يم حسن يمه تعالي
انا مقدر اشوف البيت خالي
توني افقدت عزي ودلالي
 نعي ختام مجلس دفن الزهراء 

الامام علي بعد مادفن عزيزة قلبه الزهراء غفت عينه عند ذالك القبر المغيب واذا به يسمع صوت من داخل القبر .. ياعلي عجل بالرجوع للدار ، يسألها ليش يابنت رسول الله ما اقدر افارق قبرج انتي السلوه يازهراء صاحت ياعلي زينب فزت من النوم مرعوبه تنادي اماه فاطمه اي تصوري طفله من تفز من النوم تنادي امها وماتلاقيها ياعلي 
رجع امير المؤمنين للدار شاف زينب جالسه بزاويه بالدار ولابسه عباية امها الزهراء الله اشلون موقف مؤلم 

صاحت بويه
 خفت ولوحدي بالليل فزيت 
قمت ابعباة امي تغطيت 
ياربحة امي التارسه البيت 
خله البيت يابويه خله البيت

اعتلى البكاء والصيحه جاو الحسن والحسين التموا الايتام حول امير المؤمنين شايفين الطفل اذا راحت امه وجاي يسأل عنها طفل اربع سنوات وست سنوات اشلون تقولين له امك ماتت 

بويه شحالها النامت بالقبور 
بويه قعدت بالقبر لو رايحه اتزور
بويه ايتامها في بيتها اتدور 

بويه ماقالت ولد عدها يحنون 
حسن وحسين يازهره يونون
بويه بهدومها قامو يشمون 

ذكرناها شفنا الدار ظلمه وذكرناها
وذكرنا قعدة الحلوه وياها
انا ماانساها حنينه امي ولااقدر انساها

يمه نسيت وفراشگ فرشته 
انجرح قلبي يايمه من نظرته 
انا لطمت الوجه وجيبي مزقته 

يمه فزيت من نومتي وجيتگ 
على افراشگ يايمه مالقيتگ
يمه موحش عليه صار بيتگ 

اللي يفقد عزيز يجلس ويه احبابه يسلونه على فقد عزيزه والليله  جمعه  وماظن في احد بالمجلس مو فاقد عزيز يالله ذكري عزيزج واهدي له اجر هالدمعه .. لاكن صاحب الزمان فاقد كل اهله منو يسليه منو يشيل وحشته 
وين يجلس من يشتاق ... يجلس عند اقبور احبابه 

طريت المقابر عندي اعتاب 
من عنت عليه شوفة الاحباب
ذكرت الليالي والقلب ذاب

المهدي يون ونه خفيه 
قاعد على قبر الزجيه 
ودمعاته عالوجنة  جريه 
لا تعتبين يايمه عليه

شلونج يابعد اهلي  شلونج 
جيف اصبحت لطمة عيونج 
وشحال ضلعج مع متونج 

طور المعاتيق 
آه يازهره .. آه يازهره .. آه يازهره .. آه 

وين اللي يجي يمج يازهره ويجري دمعاته
ويم قبرج يقيم النوح ويجر هالليله آهاته 
قبر الزهراء ضايع ياصاحب الزمان 
الشيعه تتمنى لو تنظر له بس نظره 

يصلي يمج الوحشه وتنعى وياه ركعاته 
وعزيه ينصب بكترج والج تتعالى آهاته 
آه يازهره .. آه يازهره .. آه يازهره .. آه 

بس اتصور صاحب الزمان من يمر بضيق وين يوقف اول باب يوقف عنده باب الزهراء وانتي وقفي معاه بقلبك وطلبي حاجتج 

يمه على ياباب اقعد حتى اتانيج
يمه واتلقاج يازهره واحييج 
 صفه المهدي يازهره امحسر اعليج

صاح 
ياغياب غيبتكم طويله 
وحملكم صعب ماقدر اشيله
انا علويه اشوفكم بالعمر ليله
............
تمت بحمد الله ونسألكم الدعاء لتعجيل فرج صاحب العصر والزمان ، ولشفاء المرضى وقضاء الحوائج

خادمتكم : رقيه صالح البطي

تابعونا بالإشتراك بـ قناة مجالس حُسينية مكتوبه خاصة لخادمات الزهراء ( رقيه وسكينه وفاطمه البطي )
: مشكول الذمه من يمسح اسم الكاتبة من المجلس او يستخدمه بغرض التجارة